Viaxe ao espazo

Hoxe empezamos a traballar sobre o espazo. Queremos aprender cousas do noso planeta, e tamén do sol, da lúa, das viaxes espaciais... Nós xa sabemos algunhas cousas sobre o espazo...ou iso pensamos! Hoxe reunímonos para poñelas en común. Aquí vos deixo todo o que saíu:

Comparativa dos planetas do sistema solar.

• Hai moitas estrelas.
• Hai moitos meteoritos.
• O Sol ten cinco cores, e xa pasou por dous.
• A Terra recibe a luz do Sol.
• En Marte hai un lago conxelado. 
• En Marte hai vida.
• A Lúa sempre está redonda, aínda que ás veces a vexamos con outras formas.
• O Sol é unha estrela.
• A Terra tarda un día en dar unha volta arredor de si mesma. 
• Hai unhas cousas que se chaman buratos de verme, que se metes neles unha nave espacial, sae por outro sitio, a un Universo paralelo.
• Os buratos de verme permítennos viaxar entre o espazo e o tempo. Hai unha persoa que foi por eles.
• A Lúa cando está pola metade, é que hai algo que a tapa.
• Hai unhas cousas que se chaman buratos negros, que marchan coa luz.
• Plutón considérase un asteroide. Non é un planeta, porque non lle chega a luz do Sol
• Hai un home que foi o primeiro de todos en pisar a Lúa.
• Todas as estrelas están feitas de lume.
• Saturno ten seis aneis, que son importantes para el, porque se os perde, caería.
• Iso de que se Saturno perde os aneis caería non pode ser, porque no espazo non hai gravidade, así que non pode caer.
• A Terra ten dous lados: cando nun é de día, no outro é de noite.
• Hai unhas cousas que se chaman meteoros ultralilas, e outras que se chaman meteoros amarelos. Os meteoros amarelos, se chocan contra o Sol, métense nun Universo paralelo.
• En Mercurio hai furados.
• Saturno o que ten non son aneis, son como pedras que están en órbita arredor del.
• Cando imos nun avión, se saímos para fóra sen traxe espacial, podemos flotar na gravidade, e morremos.
• No espazo non existe osíxeno, pero a capa de ozono dános osíxeno.
• Se estás arriba, é como se houbese un imán que te leva aínda máis para arriba.
• As estrelas están feitas de po.
• O meteorito que destruíu os dinosauros chamábase Big Bang 1.
• O primeiro home que estivo no espazo estivo tres anos, e non envelleceu nada; pero cando volveu, aquí pasara moito tempo, e a xente envellecera, e a súa familia xa morrera toda.
• A primeira en ir ao espazo foi Laika, unha cadela. 
• Se se destrúe o Universo, destrúense todos os planetas, e nós tamén morremos.

Como vedes, sabemos un montón do tema. Tal vez haxa que "darlle unhas voltiñas" a algúns dos nosos coñecementos...pero sabemos moito máis que a profe, que descoñecía moitas das cousas que contamos hoxe. 
Pero aínda queremos saber moito máis. Cando a profe nos preguntou que era o que queríamos saber, saíu un listado enorme, e con algunhas cousas bastante complicadas... Queremos saber todo isto:

• Hai vida no Sol?
• Cantos anos (exactamente) vai estar a Terra dando voltas arredor do Sol?
• Queremos estudar ben os meteoros ultralilas e amarelos.
• Cal é o planeta que está máis cerca do Sol?
• Que é unha estrela fugaz?
• Como se creou o Sol? De que está feito? Que hai no seu interior?
• Como se formou o Universo?
• Foi deus quen creou o Universo e o Sol? E daquela deus, de onde saíu?
• Existe Deus, ou non?
• Cantos países hai na Terra?
• Que son os buratos de verme? 
• Cal é a causa da gravidade?
• Por que se formou a tormenta "Hexágono"?
• Que pasa con Plutón? Por que agora xa non é un planeta?
• Que pasaría con Saturno se se separase dos seus aneis?
• Que pasaría se un meteorito chocase cun volcán?
• Como se formou a Terra?
• Por que no espazo non hai herbas nin osíxeno?
• Por que caeu un meteorito hai millóns de anos?

Como vedes, temos traballo para un anaco...A investigar!